نشر المخرج محمد سامي منشور مطول عبر حسابه الرسمي على موقع التواصل الاجتماعي فيسبوك يتحدث من خلاله عن النجمة منى زكي مشيدا بموهبتها الكبيرة التي ليس لها منافس على حد وصفه، متسائلا لماذا منى زكي وصلت إلى هذه المكانة على الرغم من وجود كبار النجوم والنجمات من جيلها؟ وفي نفس المنشور يجيب محمد سامي على تساؤلاته، ونرصد حديثه في السطور التالية.
محمد سامي يتسائل: ليه منى زكي فارقة وسابقة عن جيلها وهي الأكثر موهبة؟
بدأ محمد سامي حديثه بالتساؤل “ليه منى زكي”، وقال: كنت بتكلم مع من زكى بسلم عليها و قعدت أتكلم معاها شوية ، و أدخل من موضوع لموضوع و بعد ما قفلت سألت نفسي أكثر من سؤال ، ليه منى زكي فارقة كتير ؟، ليه عندها بريق من نوع خاص ، ليه هي النجمة الأهم و الموهبة الأكبر ، ليه هي سابقة جيلها بفرق كبير جدا رغم إن جيلها قوي و فيه زميلات نجوم حقيقيين علي جميع المستويات وموهوبين و ناجحين و قدموا أعمال مهمة ولكن محدش وصل لأنه يبقى منى زكي ، ، ليه فضلت من أول يوم ليها كممثلة لحد النهاردة أيقونة يصعب تكرارها أو القرب من حجم إسمها و مكانتها علي المستوى الفني أو علي مستوي النجومية و الموهبة أو حب الجمهور ، ليه منى زكي أكثر ممثلة تصدقها و تتوحد معاها ،ليه لو فكرت في ممثلة تلاقي صورة منى زكي هي أول صورة تيجي في بالك”.
محمد سامي يكشف سر تميز منى زكي عن غيرها من النجمات
تابع محمد سامي حديثه الذي يرصده موقع تحيا مصر كاشفًا سر تميز منى زكي عن غيرها من النجمات: “بإختصار لأن منى زكي مثقفة متعلمة راقية متطورة مش بتمثل و خلاص ولا بتظهر و خلاص ولا بتتكلم و خلاص ولا مهتمة بتفاصيل الناس الفاضية ، ست كلامها مرتب و أسألتها ليها معنى و هدف و أنا بتكلم معاها مابلاقيش لحظه من النقاش دخل في جدل بلا هدف أو كلام من أجل الكلام و خلاص ، الست دي وهي بتتكلم عن الفن تحب تسمعها و لما توصف الفن تفرح إنك تنتمي ليه من طريقة كلامها عنه لما تناقش معاها أي موضوع تلاقي وعي و حكمة و تحضر وثقافة ، ست ناجحة و زوجة و أم ناجحة، لما تتفرج علي أي مشهد ليها بتلاقيها خلته مش عادي ،بتشوف تحضير و مذاكرة ورؤية و مجهود واضح وعلام و عقل مترتب و ده بيبان في أصغر التفاصيل”.
وتابع: “بتقدم أي مشهد صعب ببساطة و شياكة من غير تصنع او تشتيت ،طريقتها في النقد شيك و تبسيطها لصعوبة أدوار عملتها بيدل علي ثقتها في نفسها اللي بلا حدود ، حتى لما نبص للقائتها أو لدورها في المجتمع أو كلامها في ندواتها حتي في الإعلانات اللي قدمتها أو أفلامها و مسلسلاتها او لبسها في أي ظهور ليها حتي لو مش رسمي هتلاقيها بتعرف تنتقي وهتلاقي دايما في جودة ورمز مشرف للست المصرية”.
بحبك يا عظيمة.. محمد سامي يوجه رسالة حب لمنى زكي
واختتم المخرج محمد سامي حديثه مشيدًا بالنجمة منى زكي وموجهًا لها رسالة حب، قائلا: “يا بخت الفن المصري و العربي بنجمة النجوم منى زكي، و يابخت كل فنان وفنانه حضرها و نسب لفترة هي فيها ، يا بخت كل زمايلها اللي من جيلها إنهم من جيل منى زكي و يا بخت كل ممثلات الجيل اللي بعدها إنهم عندهم منى زكي يتعلموا منها خاصة إنها جيل أكبر بس عشان بدأت صغيرة إنما مش أكبر منهم سنا بالعكس ما شاء الله عليها قمر و في عز شبابها و محافظه علي شكلها و أناقتها، ربنا يديم علي الفن نعمة منى زكي و دايما ناجحة و متفوقة و بتمتعنا بكل دور بتقدمه و كل مشهد بتأديه ، بحبك يا عظيمة ياللي حببتينا و لسه بتحبيبنا اكتر في مهنتنا”.
اعتزال محمد سامي
يذكر أن المخرج محمد سامي كان تصدر محركات البحث مؤخرا بعد إعلانته اعتزال الدراما التلفزيونية لفترة، معلنًا أنه سافر خارج البلاد لخوض تجربة جديدة كان يتمناها منذ فترة طويلة، وبعد انتشار الأخبار عن اعتزاله الإخراج نهائيا أكد أنه حديث غير صحيح وأنه فقط ابتعد عن الإخراج الدرامي لفترة.
المصدر : تحيا مصر